სად მიიღებთ “ტამიფლუს” უფასოდ?

საქართველოს მთავრობამ “ტამიფლუს” სუბსიდირების გადაწყვეტილება მიიღო; მოქალაქეებს 12 იანვრიდან მედიკამენტის მიღება უფასოდ შეეძლებათ.

დაავადებათა კონტროლის ეროვნული ცენტრის ხელმძღვანელი ამირან გამყრელიძე აცხადებს, რომ აფთიაქებთან “ტამიფლუს” გაცემაზე მოალაპარაკებები ჯერ არ დასრულებულა.

გამყრელიძის თქმით, ამ დროისთვის დაზუსტებით შეიძლება თქმა, რომ ეს პრეპარატი უფასოდ პირველადი ჯანდაცვის ცენტრებსა და საზოგადოებრივი ჯანდაცვის ცენტრებში გაიცემა.

“დღევანდლამდე მოგეხსენებათ, რომ “ტამიფლუ” უფასო იყო ადამიანთა ფართო ჯგუფისთვის – 18 წლამდე პირები, პენსიონერები, სოციალურად დაუცველები, ორსულები და მძიმე ქრონიკული დაავადებების მქონე პირები. დღევანდლამდე ამ ადამიანთათვის იყო უფასო “ტამიფლუ”. დღემდე ეს პრეპარატი უფასოდ გაიცემოდა საზოგადოებრივი ჯანდაცვის ცებტრში. ეს არის ე.წ. პატარა დაავადებათა კონტროლის ცენტრი. ყველა ამ ცენტრში დღეს დევს “ტამიფლუს” გარკვეული მარაგი და ეძლევა ამ კატეგორიის პირებს. გაცემა ხდება ფორმა 100-ის საფუძველზე. ხვალიდან, როდესაც ძალაში შევა, იგივე ცენტრებში წამლის გაცემა მოხდება ყველა ადამიანზე, ვისაც ის სჭირდება.

ამავე დროს დაემატება, პირველადი ჯანდაცვის ცენტრები. “ტამიფლუ” გაიცემა ასევე, პირველადი ჯანდაცვის ცენტრებიდან – თბილისში 5 ცენტრი არსებობს. გარდა ამისა, მიმდინარეობს მოლაპარაკება ფარმაცევტულ ქსელებთან, რათა იქაც გახდეს ამ პრეპარატის მიღება შესაძლებელი, თუმცა ჯერ ეს გადაწყვეტილება მიღებული არ არის. თუ რა ფორმით და როგორ მოხდება გაცემა ამ დროისთვის უცნობია,” – განაცხადა ტელეკომპანია “პირველის” ეთერში ამირან გამყრელიძემ.

Related posts